الجديدة

مشيت مع بابا و أنا مش ندمانة خالص، لأن عارفة إن إللي بيسكت مرة بيسكت كل مرة و الناس بتستغلة، و أنا عايشة مع ناس لازم أثبت شخصيتي و أعمل كرامة و حدود ليا، لو ما احترموهاش من الأول مش هيحترموها

الست مش ملزمة تخدم أهل جوزها، ولا عليها واجب الطاعة ليهم، الست تهتم ببيتها وجوزها و بس، لو هو شايف واجبات أكتر يبقى يعملها هو

عدى أسبوع، كان بيكلمني كل يوم بس مش برد، بيبعت ليا رسايل يقولي بلاش نكبر الموضوع!!!

أنا إللي أكبر الموضوع !!!

بس قولت لا هرد ولا هتكلم، لما يعرف قيمتي يبقى يجي لحد عندي

و بعد أسبوع ونص لقيته هو ومامته جايين!!

آه كنت أتوقع هو يجي لكن مامته !!

كان باين عليها جدًا إنها مضايقة و مش طايقة نفسها بس جت

_اسمعي بقا لما أقولك، أنا جاية بعد زن عليا قد كدا، رغم إن لا موافقة على الوضع دا و لا على إللي بيحصل، بس هو فضل يأنب فيا و اتخانق معايا بسببك

هو أتدخل وقال بهدوء لما لقى مامته بتبوظ الموضوع

_ أنا أتكلمت مع ماما يا مريم، و نبهت على الكل ماحدش يتدخل بينا، ومحدش يقولك تنزلي أو تعملي أي

_ آه أصلك شكلك سحرة ليه مش عارفة ملهوف كدا لي

بصيت ليها وقولت بهدوء

_ أنا مش ساحرة لحد يا طنط، دا طريق مليش فيه و الحمد لله، الحكاية كلها هو عارف أنا مين وعارف متجوز أي، و خراب البيت مش سهل، و مش بسيط زي ما حضرتك بتتكلمي

رد عليا هو وقال لبابا

_ أنا مش عايز الموضوع يوصل للمنطقة دي خالص، و حقك عليا يا حاج، أنا غلطان، بس أنا عايز مريم ترجع بيتها

_ ولما ترجع بيتها يابني هتعرف تحافظ عليها، هتعرف تشيلها في عينك زي ما قولتلي يوم ما سلمتها ليك؟ أصل يوم ما جيت بيتك مالقتش وعدك بيتتفذ، أنت عارف الراجل مربوط من لسانه

_ أنا عارف يا حاج وحقك عليا، محدش هيتدخل في خصوصية بيتنا، و إللي هي عايزاه تعمله

ردت حماتي بسرعة

_ رغم إن دا هيعمل ليا مشاكل مع مرتات ولادي التانين والله، و هيقلب الدنيا

_ أنا بنتي يا حاجة مش بتاعت مشاكل، و كل واحد بيعمل إللي بيريحه، هنا بيعملوا كدا من قبل ما بنتي تدخل البيت، فملهاش علاقة بقا بنتي نزلت ولا لا، يعتبرها مش موجودة، أنا مش عايز مشاكل و حكايات في حياة بنتي، أنا أهم حاجة عندي تكون حياتها مستقرة و نفسيتها كويسة، ولا أي يابني